ពិធីប្រគល់ពាន និងលិខិតសរសើរជូនដល់សាខា និងមន្ត្រីឥណទានឆ្នើមប្រចាំឆមាសទី១ ឆ្នាំ២០២៣ លើការលក់ធានារ៉ាប់រងខ្នាតតូច Forte
![](https://www.amkcambodia.com/wp-content/uploads/2023/10/Website-feature-1024x575.jpg)
ថ្ងៃទី ២៧ ខែតុលា ឆ្នាំ២០២៣ គ្រឹះស្ថានមីក្រូហិរញ្ញវត្ថុ អេ អឹម ខេ (AMK) និងក្រុមហ៊ុនធានារ៉ាប់រងអាយុជីវិត (Forte) បានប្រារព្ធនូវពិធីប្រគល់ពាន និងលិខិតសរសើរដល់សាខា និងមន្ត្រីឥណទានឆ្នើម លើការលក់ធានារ៉ាប់រងខ្នាតតូច នៅការិយាល័យកណ្ដាលរបស់ អេ អឹម ខេ។ ការប្រារព្ធកម្មវិធីនេះឡើងក្នុងគោលបំណងគឺដើម្បីប្រគល់រង្វាន់ជាការលើកទឹកចិត្តដល់ សាខា មន្ត្រីឥណទានឆ្នើមដែលបានខិតខំប្រឹងប្រែងកន្លងមកនេះ ក្នុងការលក់ធានារ៉ាប់រងខ្នាតតូចដល់អតិថិជនដែលប្រើប្រាស់កម្ចីរបស់ អេ អឹម ខេ។
![](https://www.amkcambodia.com/wp-content/uploads/2023/10/2-1024x576.jpg)
លោក សួន ពិសី ប្រធាននាយកប្រតិបត្តិអាជីវកម្ម គ្រឹះស្ថានមីក្រូហិរញ្ញវត្ថុ អេ អឹម ខេ បានមានប្រសាន៍ថា “ធានារ៉ាប់រងគឺមានតួនាទីសំខាន់ណាស់ ក្នុងការចូលរួមចំណែកកាត់បន្ថយភាពក្រីក្រ ក៏ដូចជាការលើកកម្ពស់ដល់ការអភិវឌ្ឍសេដ្ឋកិច្ចប្រកបដោយបរិយាប័ន្ននៅក្នុងសង្គមគ្រួសារ សង្គមជាតិ និងប្រទេសទាំងមូល ព្រោះធានារ៉ាប់រងគឺជាការធានានូវបន្ទុកហិរញ្ញវត្ថុ ដោយហេតុថាទៅថ្ងៃមុខយើងមិនដឹងថានឹងមានអ្វីកើតឡើងសម្រាប់យើង និងក្រុមគ្រួសារយើងទេ។ គិតត្រឹមខែកញ្ញា ឆ្នាំ២០២៣ អេ អឹម ខេ បានបញ្ចេញបណ្ណសន្យារ៉ាប់រងសរុបចំនួនប្រមាណ ២,៣លាន និងបានទូទាត់សំណងធានារ៉ាប់រងសរុបប្រមាណ ៦លានដុល្លារ។” លោកបានបន្ថែមទៀតថា “ខ្ញុំពិតជាសប្បាយរីករាយ និងមានមោទនភាព ចំពោះសាខា និងមន្ត្រីឥណទានទាំងអស់ដែលបានខិតខំប្រឹងប្រែងបំពេញនូវតួនាទីរបស់ខ្លួនបានយ៉ាងល្អ ហើយខ្ញុំនឹងនៅតែបន្តលើកទឹកចិត្ត ដល់មន្ត្រីឥណទាន និងបុគ្គលិករបស់ អេ អឹម ខេ ទាំងអស់ឲ្យខិតខំប្រឹងប្រែងបន្តទៀត ដើម្បីទទួលបានសមិទ្ធផលឲ្យកាន់តែល្អជាងនេះបន្ថែមទៀត”។
![](https://www.amkcambodia.com/wp-content/uploads/2023/10/3-1024x591.jpg)
គួរបញ្ជាក់ផងដែរថា គ្រឹះស្ថានមីក្រូហិរញ្ញវត្ថុ អេ អឹម ខេ បានសហការជាមួយក្រុមហ៊ុនធានារ៉ាប់រងអាយុជីវិត ហ្វតតេ ដើម្បីផ្តល់សេវាធានារ៉ាប់រងខ្នាតតូច ត្រូវបានគេស្គាល់ថាជាធានារ៉ាប់រងសុខភាព និងគ្រោះថ្នាក់ដល់អតិថិជនដែលប្រើប្រាស់កម្ចីពី អេ អឹម ខេ តាំងពីឆ្នាំ ២០១៤ រហូតមកដល់បច្ចុប្បន្ន។ គោលបំណងចម្បងសម្រាប់កិច្ចសហប្រតិបត្តិការនេះគឺដើម្បីជួយការពារអតិថិជន និងក្រុមគ្រួសាររបស់ពួកគេពីហានិភ័យធ្ងន់ធ្ងរ ពីព្រោះសុខភាព និងគ្រោះថ្នាក់គឺជាហានិភ័យដ៏សំខាន់ដែលគ្រួសារដែលមានចំណូលទាបនឹងប្រឈមមុខ ហើយជាទូទៅការចំណាយលើការប្រើប្រាស់សេវាធានារ៉ាប់រងខ្នាតតូចសម្រាប់អតិថិជនកម្ចីរបស់ អេ អឹម ខេ គឺតិចជាង ១០០ រៀលក្នុងមួយថ្ងៃ ឬត្រឹមតែ ២៥០០ រៀលក្នុងមួយខែតែប៉ុណ្ណោះសម្រាប់ការការពារសមាជិកគ្រួសារម្នាក់ៗក្នុងមួយឆ្នាំ។
![](https://www.amkcambodia.com/wp-content/uploads/2023/10/4-1024x606.jpg)