អតិថិជន អេ អឹម ខេ អាចផ្ទេរប្រាក់ដោយផ្ទាល់ទៅកាត Visa ទូទាំងពិភពលោក
![](https://www.amkcambodia.com/wp-content/uploads/2023/09/Feature-Image-1024x576.jpg)
ភ្នំពេញ ប្រទេសកម្ពុជា – កាលពីថ្ងៃទី១៤ ខែកញ្ញា គ្រឹះស្ថានមីក្រូហិរញ្ញវត្ថុ អេ អឹម ខេ (AMK) និង Visa បានប្រកាសពីកិច្ចសហការ ដើម្បីធ្វើឲ្យកាន់តែងាយស្រួលដល់អតិថិជន អេ អឹម ខេ ក្នុងការផ្ទេរប្រាក់ទៅក្រៅប្រទេសប្រកបដោយប្រសិទ្ធិភាព និងសន្សំសំចៃ។ អតិថិជន អេ អឹម ខេ អាចផ្ទេរប្រាក់ដោយផ្ទាល់ពីគណនី អេ អឹម ខេ ឬកម្មវិធីទូរស័ព្ទចល័ត អេ អឹម ខេ (AMK Mobile) ទៅកាន់កាត Visa ណាមួយបាន [1]។ កិច្ចសហការនេះ គឺនឹងលុបបំបាត់ការផ្ទេរបា្រក់បែបប្រពៃណី ធ្វើឱ្យប្រតិបត្តិការលឿន រហ័ស និងកាន់តែងាយស្រួលជាងមុន។
លោក គា បូរាណ ប្រធាននាយកប្រតិបត្តិ នៃគ្រឹះស្ថានមីក្រូហិរញ្ញវត្ថុ អេ អឹម ខេ មានប្រសាសន៍ថា “យើងមានក្តីរំភើបរីករាយក្នុងការចាប់ដៃគូជាមួយ Visa ដើម្បីផ្តល់ជូនអតិថិជនរបស់យើងនូវមធ្យោបាយរហ័ស សុវត្ថិភាព និងងាយស្រួលក្នុងការផ្ទេរ និងទទួលប្រាក់នៅជុំវិញពិភពលោក។” លោកបានបន្ថែមទៀតថា “ភាពជាដៃគូនេះ គឺជាស្ពានដ៏សំខាន់សម្រាប់ក្រុមហ៊ុនរបស់យើងទាំងពីរក្នុងកិច្ចសហការ និងការច្នៃប្រឌិត ដោយសារក្រុមហ៊ុនយើងទាំងពីរបានប្តេជ្ញាចិត្តក្នុងការផ្តល់ជូនអតិថិជនរបស់យើងនូវដំណោះស្រាយទូទាត់ដ៏ល្អបំផុត។ យើងជឿជាក់យ៉ាងមុតមាំថា ភាពជាដៃគូនេះគឺជាមធ្យោបាយមួយសម្រាប់ អេ អឹម ខេ និង Visa ដើម្បីបំពេញតម្រូវការអតិថិជនដែលកំពុងតែមានការកើនឡើង និងរួមចំណែកដល់ការរីកលូតលាស់នៃការទូទាត់តាមប្រព័ន្ធឌីជីថលនៅក្នុងប្រទេសកម្ពុជា”។
លោក Deepan Dagur នាយកប្រតិបត្តិក្រុមហ៊ុន Visa Direct ប្រចាំតំបន់អាស៊ីប៉ាស៊ីហ្វិកបានមានប្រសាសន៍ថា “ដំណោះស្រាយនៃការផ្ទេរប្រាក់តាមប្រព័ន្ធឌីជីថលបានវិវត្តខ្លួនកាន់តែខ្លាំង ដែលធ្វើឲ្យអ្នកដែលមានតម្រូវការផ្ទេរប្រាក់ទទួលបាននូវ
សេវាកាន់តែលឿន រហ័ស និងការសន្សំសំចៃ។ កិច្ចសហការរបស់ Visa ជាមួយគ្រឹះស្ថានមីក្រូហិរញ្ញវត្ថុ អេ អឹម ខេ គឺជាមធ្យោបាយមួយដែលយើងកំពុងជំរុញការផ្ទេរប្រាក់តាមប្រព័ន្ធឌីជីថល ដើម្បីជួយប្រជាជនកម្ពុជាក្នុងការផ្ទេរប្រាក់យ៉ាងរហ័ស និងសុវត្ថិភាព ជាមួយមិត្តភក្តិ និងក្រុមគ្រួសាររបស់ពួកគេដែលរស់នៅក្រៅប្រទេស។
កិច្ចសហការនេះយើងរំពឹងថានឹងផ្តល់អត្ថប្រយោជន៍ដល់អតិថិជន អេ អឹម ខេ ព្រោះឥឡូវនេះអតិថិជននឹងមានមធ្យោបាយងាយស្រួលជាងមុនក្នុងការផ្ទេរប្រាក់ទៅក្រៅប្រទេស។
របៀបផ្ទេរប្រាក់ជាមួយ AMK Mobile ៖
- ចូលទៅកាន់កម្មវិធីធនាគារទូរស័ព្ទចល័ត អេ អឹម ខេ
- ជ្រើសរើស ផ្ទេរប្រាក់ បន្ទាប់មកជ្រើសរើស ផ្ទេរប្រាក់ទៅប័ណ្ណទូទាត់ VISA
- ជ្រើសរើសគណនី បំពេញព័ត៌មានចាំបាច់ផ្សេងៗ ទៀត ដូចជា លេខកាត Visa 16 ខ្ទង់ ឈ្មោះអ្នកទទួល ចំនួនទឹកប្រាក់ និងគោលបំណង។
- សូមផ្ទៀងផ្ទាត់រាល់ព័ត៌មានដែលបានបញ្ចូល
- បញ្ជាក់ និងបញ្ចូលលេខសម្ងាត់ 6 ខ្ទង់ របស់កម្មវិធី AMK Mobile App របស់អ្នក ដើម្បីបញ្ចប់ប្រតិបត្តិការ។
![](https://www.amkcambodia.com/wp-content/uploads/2023/09/Visa-Direct_06_KH-01-1024x1024.jpg)
អំពី គ្រឹះស្ថានមីក្រូហិរញ្ញវត្ថុ អេ អឹម ខេ ភីអិលស៊ី
គ្រឹះស្ថានមីក្រូហិរញ្ញវត្ថុ អេ អឹម ខេ គឺជាគ្រឹះស្ថានមីក្រូហិរញ្ញវត្ថុឈានមុខគេក្នុងប្រទេសកម្ពុជា ដែលផ្តល់សេវាហិរញ្ញវត្ថុប្រកបដោយទំនួលខុសត្រូវ និងសម្បូរបែប ដល់អតិថិជនគ្រប់រូប និងគ្រួសារដែលមានចំណូលទាប ដើម្បីជួយសម្រេចបំណងប្រាថ្នាផ្នែកហិរញ្ញវត្ថុ និងជីវភាព ដែលពួកគាត់ចង់បាន។ អេ អឹម ខេ បានបង្កើតឡើងជាង ២០ឆ្នាំមកហើយ ដោយមានប្រតិបត្តិការនៅគ្រប់ខេត្ត និងស្រុកក្នុងប្រទេសកម្ពុជា ក្នុងនោះមានសាខាជាង ១៥១កន្លែង និងភ្នាក់ងារប្រមាណ ៦,០០០ កន្លែង។ អេ អឹម ខេ ផ្តល់សេវាហិរញ្ញវត្ថុជាច្រើនប្រភេទ រួមមានកម្ចី ប្រាក់បញ្ញើ និងសេវាប្រតិបត្តិការ/ការទូទាត់ប្រចាំថ្ងៃ។ បេសកកម្មរបស់ អេ អឹម ខេ គឺផ្ដល់សេវាហិរញ្ញវត្ថុប្រកបដោយទំនួលខុស ត្រូវ និងសម្បូរបែប ដល់អតិថិជនគ្រប់រូប ជាពិសេស ស្រ្តីនិងគ្រួសារដែលមានចំណូលទាប ដើម្បីជួយសម្រេចបំណងប្រាថ្នាផ្នែកហិរញ្ញវត្ថុ និងជីវភាព ដែលពួកគាត់ចង់បាន។
[1] អនុវត្តបានតែប្រទេសដូចជា៖ ប្រ៊ុយណេ អាល្លឺម៉ង់ ឥណ្ឌា ឥណ្ឌូនេស៊ី អ៊ីតាលី ម៉ាកាវ ម៉ាឡេស៊ី នូវែលសេឡង់ ហ្វីលីពីន សិង្ហបុរី ថៃ វៀតណាម និងចក្រភពអង់គ្លេស។